Ramdhan Karim

ماہِ رمضان المبارک
کی ہر سال آمد بھی ربِ کائینات کا ایک احسانِ عظیم ہے، کیونکہ دید و شنید کی باتیں اور آموختہ سبق کو بھول جانا انسانی فطرت کا خاصہ ہے۔
جیسا کہ معروف ہے :
الانسان مركب من الخطا و النسیان
(انسان خطا و بھول سے مرکب ہے)

اور گاہے بگاہے انسانوں کو یاددہانی کی ضرورت رہتی ہے۔ جیسے سرکاری تعلیمی اداروں کو بھی کبھی کبھی ایک مختصر سا کورس کرایا جاتا ہے تاکہ ان کی خوابیدہ تدریسی صلاحیتوں کو جِلا دی جائے اور وہ پھر سے تندہی کے ساتھ تدریسی فرائض اور خدمات انجام دینے لگیں۔
اس کورس کو ہی " ریفریشر کورس" کہا جاتا ہے۔

بالکل اسی طرح سال کے 11 مہینوں میں مسلمان کی عملی قوتوں میں آہستہ آہستہ ضعف و کمزوری در آتی ہے تو اتنے میں اللہ کی کرم گستریوں اور عنایتوں کا مہینہ "رمضان المبارک" پھر آ جاتا ہے جو روزہ داروں کے لیے اخلاقی و روحانی تربیت گاہ یا ریفریشر کورس کا کام کرتا ہے ، ان کی عملی کمزوریوں اور کوتاہیوں کا ازالہ کرتا ہے اور انہیں پھر سے نئے جوش اور جذبۂ اطاعت کے ساتھ میدانِ عمل میں لا کھڑا کرتا ہے۔

اللہ تعالیٰ ہم سب کو اس ماہِ مبارک کی سعادتوں سے بہرہ ور ہونے اور اپنے اعمال کی اصلاح کرنے کی توفیق سے نوازے ، آمین۔

اقتباس : روشنی سپلیمنٹ ، اردو نیوز ، سعودی عرب : جمعہ 13/اگست/2010ء